Teknopataren txokoa » Softwarea

Kaixomaitia plus

joxe — Fri, 17 Feb 2012 18:56:47 +0000

Ligoteo geolokalizatua, orain euskaraz ere bai

Jakingo duzuenez, aste honetan bost urte egin ditu kaixomaitia.com euskaldunak harremanetan jartzeko webguneak.

Urteurrena ospatzeko hainbat berrikuntza egin dituzte, tartean deigarriena Android sistemarako aplikazioa, balizko kaixomaitiak geolokalizatzeko sistema eta guzti.

Aplikazioa oso ondo dago (egizue proba eta esango didazue!) baina, badakizue, teknopatok beti urrats bat aurrerago goaz, eta zer hobetua ere ikusi diogu jadanik.

Izan ere, aste honetan bertan izan dugu Kissenger izeneko errobot baten berri. Prototipoa baino ez da oraingoz, baina kaixomaitiaren osagarri perfektua dela esan daiteke beldurrik gabe.

Kissenger silikonazko ezpainak dituen pelotatxo bat da, eta, hain zuzen ere, musu birtualak bidaltzeko balio du. Zuk zure pelotatxoari muxu eman, eta berak bere antzeko beste edozein pelotari bidal diezaioke. Bere jabeak abisu bat jaso eta, bere ezpainak errobotaren kontra jarrita, zure musuaren ‘kopia’ jasoko du, intentsitate eta grina berberarekin. Baina hobe da zuek zeuek ikustea:

Click here to view the video on YouTube.

Horra gure gomendia, beraz, kaixomaitia.com-eko lagun eskuzabalei Aplikazioaren 2.0 bertsioa ateratzen denean, Kiseenger batekin batera saldu! Arrakasta ziurra!!!

Mac OS X katalanez

joxe — Fri, 13 Jan 2012 00:03:38 +0000

Mac OS Xen interfazea katalanez (Irudia: VilaWeb)

MacRumors webgunean zabaldu zuten atzo zurrumurrua, eta VilaWeben egiaztatu ez ezik, probatu ere egin dute. Erabiltzaileongana laster iritsiko den Mac OS X sistemaren 10.7.3 bertsioa katalanez erabili ahal izango da.

Egunotan Applek programatzaileei zabaldu dien probako bertsioan, sistemaren interfazearen zati bat behintza katalanez agertzen da Oriol Martí blogariak VilaWeberako egindako probaren arabera. Finder (idazmahaia kontrolatzeko aplikazioa) eta sistemari lotutako aplikazioak dira katalanera itzuli dituztenak.

Katalanaz gain, Appleren sistema eragilearen eguneratze honek beste zazpi hizkuntza gehitu dizkio sistemari: kroaziera, greziera, hebreera, errumaniera, eslovakiera, thaiera eta ukrainera.

Eta euskara noizko? Batallitak kontatzen hasiko nintzateke berriro, baina enfin…

Instalatu Xuxen Mac OS X sisteman

joxe — Tue, 01 Nov 2011 03:20:46 +0000

Warning: preg_match() [function.preg-match]: Delimiter must not be alphanumeric or backslash in /home/joxe/teknopata.net/wp-includes/media.php on line 1171

Warning: preg_match() [function.preg-match]: Delimiter must not be alphanumeric or backslash in /home/joxe/teknopata.net/wp-includes/media.php on line 1171

Mac OS X sistema eragileak dituen gauza on guztien artean, sistemaren zerbitzu gisa dabilen zuzentzaile ortografikoa da. Hari esker, edozein aplikaziotan idazten dugun testuen zuzentasun ortografikoa zaindu dezakegu.

Horraino dena oso polita, bai… baina badakizue Apple ez dela oso-oso euskaltzalea. Sistemaren zuzentzaile ortografikoa hainbat hizkuntzatan erabil daiteke, baina Aitorren hizkuntza zaharra ez da horietako bat.

Gauzak horrela, Mac-ean euskara ultrazuzena erabili nahi/behar dugunok oso aukera gutxi dugu: OpenOffice.org testu prozesadorea, Firefox/Thunderbird tandema, eta Office 2008. Nik dakidala, horiek dira euskarazko zuzenketak egiteko aukera duten Mac aplikazioak.

Hobeto esanda, hala uste nuen nik. Izan ere, egunotan horren inguruko bilaketatxo bat egiten aritu naiz, eta, nire harridurarako, oso-OSO-oso erraza da Mac OS Xen zuzentzaile ortografikoari euskara irakastea… 10.6 ‘Snow Leopard’ eta 10.7 ‘Lion’ bertsioan bai behintzat!

Ez naiz teknizismo handitan sartuko (berehala konturatuko baitzinatekete ideiarik ere ez dudala!), baina azkar azaltzeko, kontua da Appleren zuzentzaile ortografikoak Hunspell izeneko zuzenketa sistema librea darabilela. OpenOffice.org-k darabilen berbera! Beraz, teorian behintzat nahiko da Lionen zuzentzaileari OpenOfficeren zuzenketa hiztegiak ematea, gure Mac-ak euskarazko ortografia zuzentzen hasi ahal izateko.

…eta praktikan ere bai! Prozedura oso erraza da, hona jarraitu beharreko pausuak:

Deskargatu Xuxenen Mac bertsioa Eusko Jaurlaritzaren euskarazko software orritik.
Destrinkotu artxiboa: hauen antzeko jarraibideak dakartzan PDF bat eta beste artxibo konprimitu bat aurkituko dituzu.
Destrinkotu bigarren ZIP artxibo hori.
Hartu bertan dauden bi fixategiak (euskara.aff eta euskara.dic) eta zure disko gogorreko /Libreria/Spelling karpetan kopiatu.
Ireki sistemaren hobespenak, eta joan Idioma y texto atalera Euskara sistemaren hizkuntza gisa ezartzeko. Ondoko bideoan ikus dezakezue nola:

‘Texto’ atalean, ziurtatu euskara gaituta dagoela zuzentzeko hizkuntza aukeren artean:

Kitto! Prest duzu zure Mac-a euskaraz idazten duzunean ere zuzenketa ortografikoak egiteko! Zuzenketa horiek (ia) edozein programatan egin ditzakezu Editar >Ortografía menutik. On egin!!!

Gidatzean talkarik ez egiteko laguntzailea

joxe — Tue, 20 Sep 2011 12:57:59 +0000

Seguru behin baino gehiagotan pentsatu duzuela: bale, oso polita nire telefono aurreratua, oso ikusgarriak errealitate hedatua erabiltzen duten aplikazioak… baino balio-balio… zertarako balio dute?

Lasai, hemen nator balizko fede-krisia konpontzera, ideia sinple bezain on batekin: sakelakoak eta errealitate hedatua uztartzen dituen iOnRoad Android sitemarako aplikazioa.

HAISUEK, TXOKATUKO SARELA!!!

Aplikazioak gure segapotoko kamera eta GPSa erabiltzen ditu errepidea ‘ikusi’ eta parean ditugun oztopoetatik zenbateko distantziara gauden kalkulatzeko. Horrez gain, erabili ahal izateko telefonoa jartzeko euskarria behar dugu haizetakoan. Aplikazioa, gainera, bigarren planoan izan dezakegu zabalik musika entzun edo GPS nabigatzailea erabiltzen dugun bitartean.

Eta orain, onena: probatu nahi izanez gero, beta bertsioa dohainik eskura daiteke momentuz, garatzailearen webgunetik. Hori bai, kontuan izan, ofizialki behintzat, honako gailu hauetan soilik funtzionatzen duela:

Samsung Galaxy S II
LG Optimus 2X
HTC ThunderBolt 4G
Google Nexus S
HTC Incredible S

Nirea ez da horietako bat ere, baina tira, probatu egin beharko ezta?

Bideo-errepasoa: SwiftKey X teklatu birtuala

joxe — Sun, 18 Sep 2011 20:45:00 +0000

Aurrekoan eman nizuen Android sistema eragilerako SwiftKey X teklatu birtualaren berri. Euskarazko euskarria ofiziala da orain, eta (lehengo eguneko zozketaren arrakasta ikusita!) bideo-errepasotxo bat egitea bururatu zait. Hona:

Probako bertsioa hemendik instala dezakezue, edo QR kodea erabiliz. Ez horregatik!!!

Euskarazko testu iragarpenak Swiftkey-ri esker

joxe — Wed, 24 Aug 2011 15:22:56 +0000

Oso hilabete gorabeheratsua izan dugu telefonia kontuetan, baina badirudi pozik bukatzeko modua eremu izango dugula.

EiTBko Lontzo Sainzek eman dit abisua gaur bertan: eitb.com-en bertan ere iragarri dutenez, TouchType enpresak euskarazko testu iragarpenak egiteko ahalmena gehitu behar dio Swiftkey delako teklatu birtualari.

Swiftkey euskaldunaren beta bertsioa martxan, hitzak aurreikusi eta aurreikusi

Ideia, nonbait, Bilbon izan zen Nonick topaketan sortu zen eta, gauzak ondo bidean, datorren astetik aurrera gauzatuko da, orduantxe hasiko baitira Swiftkeyri erantsi behar dizkioten hizkuntza berriak hedatzen. Euskararen kasuan, EiTBk euskaraz eta ingelesez idatzitako testuak utzi dizkio enpresari, alderaketa egin eta aplikazioari euskarazko testu-aurreikuspenak egiten ‘irakasteko’… eta orain sistema probatzeko beta testerrak behar dituzte. Nik izena eman dut jadanik, eta harrituta nago emaitzekin. Hobekuntza eta zuzenketa txikiak behar ditu oraindik, noski, baina oso pozgarria da azkenean euskarazko testuak idazteko ere horrelako laguntza izatea!

SwiftKey instalatzean euskara ere aukera dezakegu gure hizkuntza gisa

Zer da SwiftKey hori bada?

Swiftkey Android sistema eragilerako teklatu birtuala da, hots: pantailatik bertatik idatzi ahal izateko software aplikazio txikia. Teklatu horiek, normalean, aspaldiko segapotoen T9 sistemaren antzekoa dakarte. Horri esker, hurrengo hitzaren lehen hiruzpalau letrak soilik tekleatuta, telefonoak hitz osoa zein den aurreikusi eta automatikoki idatz dezake, guk letra guzti-guztiak sakatu beharrik gabe.

SwiftKeyk, egileen arabera, oso aurreikuspen zehatzak egiteko gauza da, eta erabiltzailearen idazkeratik ikas dezake. Hau da, zenbat eta gehiago erabili, orduan eta errazago asmatzen du zein den idatzi nahi dugun hurrengo hitza. Nahi izanez gero, gainera, gure Facebook, Twitter edo posta kontuak aztertzen utzi ahal diogu, orain arte idatzi dugun horretatik ere ikas dezan.

Orain arte, SwiftKeyk aurreikuspen horiek 18 hizkuntzatan egin zitzakeen. Datorren astetik aurrera, berriz, afrikaans, kroaziera, galegoa, turkiera eta euskara ere erabili ahal izango ditu, azken hori EiTB eta TouchType-ren arteko elkarlanari esker.

Nik ere probatu nahi dut!!!

QR kode honek SwiftKey erosteko aukera emango dizu zuzenean

Tira, hemen hasten dira albiste ez hain onak… Izan ere SwiftKey produktu komertziala da, eta erabili ahal izateko erosi beharra dago (2,78 euroko prezioa du). Behin hori eginda, Nikiforos Karamanis garatzailearekin jarri behar zara kontaktuan (ingelesez!) euskarazko bertsioa hobetzen laguntzeko prest zaudela esanez. Halaxe egin izan dut nik, eta di-da azaldu didate zer egin probako bertsioa jaitsi eta euskarazko aurreikuspenak aktibatzeko. (Erroretxo bat ere aurkitu dut dagoeneko!).

Tira, badakit idealena euskarazko euskarria Androidek berak ematea litzatekeela, baina momentu hori iristen den bitartean, albiste txar-txarra ere ez da, ezta?

Asteko erosketa, metroan

joxe — Thu, 14 Jul 2011 22:09:48 +0000

Asteko erosketa metroan egiteko aukera. Horixe eskaintzen die HomePlus supermerkatu kateak Seulen bizi diren bezeroei.

Berez, Erresuma Batuko Tesco kateak eta bere jaioterrian apur bat denetik egiten duen Samsung enpresa korearrak elkarrekin sortutako marka da HomePlus supermerkatu katea. Nonbait, Hego-Koreako bigarren katea izatea lortu dute, eta erronka jarri diote bere buruari: lehenengoak izatera iristea, denda gehiago zabaldu gabe.

Erosketak supermerkatuetatik kanpo egiteko bideak irekitzea bururatu zitzaien horrela. Korearrak munduko jenderik lanpetuena izateko ohorea dutela kontuan hartuta, ideiak arin hartu zuen forma: zergatik ez eman aukera korear lanpetuei erosketak egiteko metroan batetik bestera doazen bitartean?

Esan eta egin. Supermerkatu kateak panel erraldoiak instalatu ditu hainbat geltokitan, dendetan aurki daitezkeen espositoreen argazkiekin. Argazkiotan salgai dauden produktuak ikus daitezke, bakoitzak bere prezioa eta QR Codea duela. Erosketa egin nahi duenak, sakelakoan dabilen aplikazio batekin nahi dituen produktuen QR Codeen argazkiak egin behar ditu. Aplikazioak erosketa zerrenda osatzen du kode horietan oinarrituta, eta supermerkatura bidaltzen du automatikoki. Gure korear nekatua gauean etxera iristen denerako, hantxe izango du eskatutakoa, bere zain.

Ideia era esperimentalean probatzenari dira, baina bultzatzaileek diotenez oso emaitza onak izan ditu, eta nahi zituzten helburuak bete egin dituzte. Bideo honetan dituzue, ingelesez, ekimenaren inguruko azalpen gehiago (autobonbo kutsu handiarekin, hori bai).

Click here to view the video on YouTube.

Zer iruditzen? Nik, egia esan, ez daukat oso argi ideia erabilgarria, beldurgarria, lasaigarria ala are estresanteagoa den…

Harribitxi txiki bat

joxe — Thu, 07 Jul 2011 22:12:40 +0000

Banderatxoak aukerakoak dira, e?

Harribitxi txiki bat aurkitu dut gaur blogaren tripetan sartu naizenean: Googleren itzulpen zerbitzua gure blogean txertatzeko gehigarria! Hari esker, blogean idazten duguna Googleren ulertzen dituen 59 hizkuntzetako edozeinera itzultzeko aukera eskaini ahal diegu gure irakurleei, era automatikoan eta klik pare bat soilik eginda!

Sekulako aukera iruditzen zait euskarazko blogei ikusgarritasun handiagoa emateko, eta hori dela eta ikusi bezain pronto txertatu dut hemen, eskumatara duzuen barran. Badakit itzulpenak ez direla beste munduko ezer, baina aizue, nonbaitetik hasi behar da, ezta? Pentsatzen dut plugin hau erabiltzea aukera paregabea dela aldi berean Googleren itzultzaile automatikoa euskarazko testuz elikatzeko, aparteko esfortzurik gabe eta itzulpen horiek hobetuz.

Eguneratzea!

Sustatuko lagunek ondo azaldu dute nola txertatu itzultzaile automatikoa Googleren zerbitzu ‘ofiziala’ erabiliz. Nik blog honetan erabili dudana ‘hirugarren batek’ garatutako gehigarri bat da. Bada, gaur konturatu naiz, WordPresserako bertsioa ez ezik, GTranslate pluginak badituela bertsioak Joomla, Drupal eta TYPOlight plataformatan erabiltzeko, baita HTML kodean zuzenean txertatzeko widgeta ere. Sustatuk azaldutako bidearekin arazorik baduzue, beharbada hau izan daiteke alternatiba on bat.

Bide batez, badakizue OpenTraden oinarritutako antzeko ezer dagoen?

Angrybirdsmenpekotasunak badu sendabidea!!!

joxe — Mon, 21 Mar 2011 09:00:05 +0000

Txoriak vs Txerriak

Seguruenik, honezkero ondo ezagutuko duzue Angry Birds bideojolas ezin adiktiboagoa. Arrautzak lapurtu dizkieten txerriak akatu nahi dituzten txorien jolasak buelta osoa eman dio munduari, dela iPhonean, dela munduko beste plataforma informatiko ea guztietan. Jolasaren sinpletasunak oso izaera adiktiboa eman dio, eta mundu osoan milioika gara eragin horren pean jausi garenok.

Baina lasai egon! Zorionez, telebista badugu, eta haren barruan ‘teledenda’ erako saioak, munduan diren eta ez diren mirakulu guztiak saltzeko prest. Horra, esterako, Mike Tysonen hiru urratseko programa berezia, angrybirdsmenpekotasuna desgarerrarazteko!

Ikusi, ikusi! Baietz eskaria egiteko gogoak eman?!

Click here to view the video on YouTube.

Twidroyd eta beste hainbat aplikazio, debekatuta

joxe — Sat, 19 Feb 2011 14:37:51 +0000

Twitter eskuko telefonotik erabiltzen dugunotako askok ezusteko ederra hartu genuen atzo arratsaldean. Izan ere, erabilera baldintzak urratu izana leporatuta, Twitterrek hainbat aplikazio blokeatu zituen, tartean Android erabiltzaileontzako ia-ia ‘estandarra’ den Twidroyd ezaguna. Harekin batera iPhone eta Blackberryrako UberTwitter eta iPhonerako UberCurrent ere blokeatu ditu Twitterrek.

Microblogging plataformako arduradunek diotenez, horrelako aplikazio blokeoak ohikoak izaten dira segurtasun edo baimen kontuak direla medio, baina oraingoa larriagoa izan da, blokeak erabiltzaile pilo bati eragin diolako. Twitterrek dioenez, hiru aplikazioek segurtasun arazoak eta plataforma erabiltzeko hainbat gidalerro urratu omen dituzte, besteak beste:

pribatutasun arazoak 140 karaktere baino gehiagoko mezu pribatuekin
aldaketak erabiltzaileek sortutako edukietan dirua irabazteko asmoz
twitter marka erabiltzeko baimenen urraketak

Beste ezer gutxi aurkitu dut hor zehar kontu honen inguruan, baina esango nuke, Twidroyd-i dagokionez, 5.0 bertsio berrian mezu luzeegiak tmi.me zerbitzua erabiliz automatikoki laburtzeko aukera gehitu izanak ekarri duela arazo nagusia. Erabiltzaileen arteko mezu zuzenak twitter ez den plataforma batetik prozesatuz gero, mezu horien pribatutasuna ezbaian geratzen da, eta seguruenik hori izango da Twidroyd blokeatzeko arrazoi nagusia. Mezu luzeak laburtzeko aukera hori defektuz gaituta dator Twidroyd 5.0 bertsioan.

Badirudi arazoa behin-behinekoa dela, eta Twidroydeko jendeak dagoeneko esana du laster egongo dela eskuragarri arazoak konpontzen dituen bertsio berri bat. (Arazo larria izango lukete bestela, kontuan izanda erabiltzaile askok aplikazioa ordaindu egin dugula).

Bien bitartean, Twitterek bere aplikazio ofiziala erabiltzeko aukera eskaini digu kaltetuoi. Eta horregatik bada jokaldi hau guztia aplikazio horren erabilera areagotzeko maniobra bat besterik ez dela pentsatzen duenik…