Zorionez, badirudi kezka hori zabaltzen doala, eta nire pozerako, sakelako gailuetarako euskarazko edukiak ez dira nik uste nuen basamortu lehorra. Ondo bilatuz gero, oasiak ere aurki daitezke han eta hemen. Albisteak patrikan eta euskaraz izan nahi dituenak, esaterako, badu non aukeratu:

1.- Sustatu.com

Hasieratik hastearren… sustatu.com euskarazko albistegi digitalen dekanoak badu bere bertsio ibiltaria, eta hura ere bertsio ibiltarien dekanoa dela esan liteke.

Codesyntaxeko lagunek 2002ko abenduan prestatu zuten Sustaturen bertsio sinplifikatu bat Palm eta beste gailu batzuetan AvantGo aplikazioa (goian bego) erabiliz irakurtzeko. Hara iristeko, www.sustatu.com/pda helbidea erabili behar da.

2012an, AvantGo-rik ez dago jadanik, baina Sustatu sinplifikatuak zutik dirau, eta adinaren eragina igartzen bazaio ere, erabilgarria da oraindik.

2.- Zuzeu.com

Albistegi digital ‘puroekin’ jarraituz, zuzeu.com-ek ere badu bertsio ibiltaria. Webgune osoa WordPress blog plataformaren gainean egina dago, eta zuzeu.com-en edukiak patrikaratzeko lana ere WordPressen doako gehigarri batek egiten du: WPtouch du izena, eta blog honetan bertan ere erabiltzen dut, zuzeuko lagunek egindako euskaraketa eta guzti.

Pluginak oso itxura ‘modernoa’ ematen dio WordPressekin egindako edozein bitakorari, ia-ia batere lanik eman gabe. Erabiltzaileak ere ez du aparteko lanik hartu behar sakelako bertsioa ikusteko, WPtouch bera arduratzen baita erabiltzailearen gailuaren araberako bertsioa erakusten. Orriaren bukaeran bertsio mugikorra desgaitzeko aukera ere ematen du, gauzak bere jatorrizko diseinuarekin ikusi nahi izanez gero…

WPtouch gehigarri hori sekulako aurkikuntza izan da, eta oso-oso erabilgarria iruditzen zait WordPressekin euskarazko gauzatxoak egiten gabiltzanok mugikorretara ere salto egiteko. Oso erraza da erabiltzen, baina egunen batean saiatuko naiz tutorialtxo bat egiten…

Bai, eta zer? Hemen ez bada, esango didazue ba autobonboa non egin behar dudan!

3.- Argia

Hedabide tradizionaletara bagoaz, Argia astekariaren bertsio ibiltaria ere aurkikuntza handia izan da niretzat. Idearik ere ez daukat honen xehetasun teknikoen inguruan, baina itxuraz oso txukuna da, erraz irakurtzen da pantaila txikian, argazkiak eta guzti, eta, aurrekoak bezala, berak bakarrik atzematen du zer gailu motarekin sartu zaren eta horren arabera egokitzen du pantaila.

Gailu txikietarako bertsioak oso nabigazio erraza eskaintzen du, eta sarritan asko eskertzen diren funtzio sinple batzuk ere, hala nola letraren tamaina aldatzea, edota eduki bakoitza zuzenean partekatzeko eta komentatzeko aukera. Ah! Baita egileen jarraitzaile egitekoa ere.

Zuzeun bezala, Argia ibiltariak bertsio osora pasatzeko aukera ere eskaintzen digu.

4.- Berria

Berria ere patriketara sartu zaigu duela ez asko. Testuzko zein ikus-entzunezko edukiak eskaintzen ditu eta, besteek bezala, bertsio mugikorra behar dugun ala ez automatikoki atzematen du, eta hala ere aukera ematen digu nahi dugunean pantaila osoko bertsiora pasatzeko.

Eskaini behar duen albiste kopuruarengatik seguruenez, guztietan kargatuena iruditu zait Berriaren sakelako bertsioa. Esango nuke editoreek tartetxo bat hartu beharko luketela pentsatzen bertsio zabaleko eduki guztiak sakelakoan ere sartu behar diren ala ez, eta iragazirik jarriz gero nolakoa eta zeren araberakoa izan behar duen. Baina ei, lehenengo urrats gisa oso txukuna da hala ere! (Bestek egindakoa kritikatzea oso erraza da, badakit!).

5.- TOKIKOM

Bestek egindakoa kritikatzea erraza denez, neurri batean gutxienez neuk egindakoari emango diot egurra orain . Topagunean bazkidetutako tokiko hedabideei presentzia eta bateratasun handiagoa eman nahian, TOKIKOM marka bateratua sortu genuen duela urte pare bat.

Markaren elementuetako bat tokikom.com albiste batzailea da. Webgune horretan orden kronologikoan ikus daitezke edizio digitala duten tokiko hedabideen azken albisteak, eta nahi izanez gero herri edo eskualde bakar batekoak soilik aukeratu daitezke.

Batzailea bera zein iaz abiatu genuen bertsio mugikorra prekario samarrak dira, baina datozen asteotan astindu ederra emango diogu TOKIKOMen kontzeptu osoari, eta emaitza digitaletan ere laster ikusiko da aldea

6.- Goiena

Tokikoez ari garela, ezin aipatu gabe utzi oraindik ere beta fasean dagoen Goiena Debagoieneko komunikazio taldearen bertsio ibiltaria. Egitura teknikoaz ezertxo ere jakin gabe, esango nuke ARGIAren sistema berbera edo bere aldaeraren bat erabiltzen duela eta, besteak beste, geolokalizazioa erabiltzen saiatzen da, zugandik hurbilen dauden albisteak eskaintzeko.

Goiena TB eta Arrasate Irratira ere iristeko aukera eskaintzen du, eta oro har, itxuraz eta funtzio aldetik oso txukuna da nahiz eta, Berriak bezalaxe, beharbada eduki lartxo izan.

Argiak bezalaxe, Goiena ibiltariak edukiak zuzenean komentatzeko zein partekatzeko aukera eskaintzen du.

7.- Uhinbak

Aurrekoak ez bezala, uhinbak aplikazioa da, hots: zure segapotora jaitsi beharreko programa bat. Android zein iOS gailuetan erabil daiteke, eta euskarazko 12 irrati online entzuteko aukera ematen du.

Hori bai, egitasmoaren berri ematen duen webgunea ez dago sakelako gailuetarako egokituta! ¬.¬

8.- EiTB

m.eitb.com webgunea

Euskal Irrati Telebistaren edukiak bi eratara ikus daitezke segapototik: webgunetik zuzenean edo aplikazio baten bidez.

• m.eitb.com webgune mugikorraren helbidea eskuz sartu behar da telefonoan, bestela sistemak pantaila handirako bertsiora eramango gaitu-eta. Hiru motatako edukiak eskaintzen dizkigu aukeran: bideoak (oso kalitate handikoak, egin ditudan probetan), audioak eta argazkiak; eta lau hizkuntza: euskara, frantsesa, ingelesa eta gaztelera (anana zaporeko Sugus bat lehenetsitako hizkuntza zein den asmatzen duenarentzat). Geolokalizazioa erabiltzeko baimena ere eskatzen du, nahiz eta gero ondorio praktikorik ez izan.
• Aplikazioa. Uhinbak bezala, EiTBk aplikazio propioa du Android eta iOS gailuetarako. Aplikazioarekin telebistako albistegiak nahi dugun unean ikusi, taldeko irratiak online entzun, eitb.com atariko albisteak irakurri eta ETBko saioak ikus ditzakegu sakelakoan.
  Webguneak ez bezala, aplikazioak interfazerako zer hizkuntza nahiago dugun galdetzen digu lehen aldiz erabiltzean. Aukera horrek aplikazioaren interfazeari eragiten dio, baina esango nuke oraindik teknikoki findu behar dutela hizkuntza aukera horrek edukiei ere eragin diezaien. Edonola ere, hau ere aplikazio txukuna da.

Ikusten duzuenez, boteprontoan pentsa daitekeena baino askoz ere aukera gehiago ditugu gure gailu ibiltariak euskarazko edukiekin elikatzeko… eta hauek hedabide ‘tradizionalak’ baino ez dira. Seguru nago beste makina bat blog, webgune eta aplikazio solte dabilela hor zehar. osatuko dugu katalogoa? Zuek zeintzuk ezagutzen dituzue? Gehitu sarrera honen komentarioetan edo twitterren #euskarapatrikan etiketarekin!

Ligoteo geolokalizatua, orain euskaraz ere bai

Jakingo duzuenez, aste honetan bost urte egin ditu kaixomaitia.com euskaldunak harremanetan jartzeko webguneak.

Urteurrena ospatzeko hainbat berrikuntza egin dituzte, tartean deigarriena Android sistemarako aplikazioa, balizko kaixomaitiak geolokalizatzeko sistema eta guzti.

Aplikazioa oso ondo dago (egizue proba eta esango didazue!) baina, badakizue, teknopatok beti urrats bat aurrerago goaz, eta zer hobetua ere ikusi diogu jadanik.

Izan ere, aste honetan bertan izan dugu Kissenger izeneko errobot baten berri. Prototipoa baino ez da oraingoz, baina kaixomaitiaren osagarri perfektua dela esan daiteke beldurrik gabe.

Kissenger silikonazko ezpainak dituen pelotatxo bat da, eta, hain zuzen ere, musu birtualak bidaltzeko balio du. Zuk zure pelotatxoari muxu eman, eta berak bere antzeko beste edozein pelotari bidal diezaioke. Bere jabeak abisu bat jaso eta, bere ezpainak errobotaren kontra jarrita, zure musuaren ‘kopia’ jasoko du, intentsitate eta grina berberarekin. Baina hobe da zuek zeuek ikustea:

Click here to view the video on YouTube.

Horra gure gomendia, beraz, kaixomaitia.com-eko lagun eskuzabalei Aplikazioaren 2.0 bertsioa ateratzen denean, Kiseenger batekin batera saldu! Arrakasta ziurra!!!

Aurrekoan eman nizuen Android sistema eragilerako SwiftKey X teklatu birtualaren berri. Euskarazko euskarria ofiziala da orain, eta (lehengo eguneko zozketaren arrakasta ikusita!) bideo-errepasotxo bat egitea bururatu zait. Hona:

Probako bertsioa hemendik instala dezakezue, edo QR kodea erabiliz. Ez horregatik!!!

EiTBko Lontzo Sainzek eman dit abisua gaur bertan: eitb.com-en bertan ere iragarri dutenez, TouchType enpresak euskarazko testu iragarpenak egiteko ahalmena gehitu behar dio Swiftkey delako teklatu birtualari.

Swiftkey euskaldunaren beta bertsioa martxan, hitzak aurreikusi eta aurreikusi

Ideia, nonbait,  Bilbon izan zen Nonick topaketan sortu zen eta, gauzak ondo bidean, datorren astetik aurrera gauzatuko da, orduantxe hasiko baitira Swiftkeyri erantsi behar dizkioten hizkuntza berriak hedatzen. Euskararen kasuan, EiTBk euskaraz eta ingelesez idatzitako testuak utzi dizkio enpresari, alderaketa egin eta aplikazioari euskarazko testu-aurreikuspenak egiten ‘irakasteko’… eta orain sistema probatzeko beta testerrak behar dituzte. Nik izena eman dut jadanik, eta harrituta nago emaitzekin. Hobekuntza eta zuzenketa txikiak behar ditu oraindik, noski, baina oso pozgarria da azkenean euskarazko testuak idazteko ere horrelako laguntza izatea!

SwiftKey instalatzean euskara ere aukera dezakegu gure hizkuntza gisa

Zer da SwiftKey hori bada?

Swiftkey Android sistema eragilerako teklatu birtuala da, hots: pantailatik bertatik idatzi ahal izateko software aplikazio txikia. Teklatu horiek, normalean, aspaldiko segapotoen T9 sistemaren antzekoa dakarte. Horri esker, hurrengo hitzaren lehen hiruzpalau letrak soilik tekleatuta, telefonoak hitz osoa zein den aurreikusi eta automatikoki idatz dezake, guk letra guzti-guztiak sakatu beharrik gabe.

SwiftKeyk, egileen arabera, oso aurreikuspen zehatzak egiteko gauza da, eta erabiltzailearen idazkeratik ikas dezake. Hau da, zenbat eta gehiago erabili, orduan eta errazago asmatzen du zein den idatzi nahi dugun hurrengo hitza. Nahi izanez gero, gainera, gure Facebook, Twitter edo posta kontuak aztertzen utzi ahal diogu, orain arte idatzi dugun horretatik ere ikas dezan.

Orain arte, SwiftKeyk aurreikuspen horiek 18 hizkuntzatan egin zitzakeen. Datorren astetik aurrera, berriz, afrikaans, kroaziera, galegoa, turkiera eta euskara ere erabili ahal izango ditu, azken hori EiTB eta TouchType-ren arteko elkarlanari esker.

Nik ere probatu nahi dut!!!

QR kode honek SwiftKey erosteko aukera emango dizu zuzenean

Tira, hemen hasten dira albiste ez hain onak… Izan ere SwiftKey produktu komertziala da, eta erabili ahal izateko erosi beharra dago (2,78 euroko prezioa du). Behin hori eginda, Nikiforos Karamanis garatzailearekin jarri behar zara kontaktuan (ingelesez!) euskarazko bertsioa hobetzen laguntzeko prest zaudela esanez. Halaxe egin izan dut nik, eta di-da azaldu didate zer egin probako bertsioa jaitsi eta euskarazko aurreikuspenak aktibatzeko. (Erroretxo bat ere aurkitu dut dagoeneko!).

Tira, badakit idealena euskarazko euskarria Androidek berak ematea litzatekeela, baina momentu hori iristen den bitartean, albiste txar-txarra ere ez da, ezta?

Nire dendan saltzen duzuna, niretzat

Lastima Firefoxekin ez dabilela! (momentuz sikieran!)

Bigarren albisteak zerikusi handia du duela ez asko hona ekarri genuen beste batekin: Financial Times egunkaria, Applek bere gailuetako App Store delakoan argitalpenen salmenta edo harpidetza kudeatzeko ezartzen dituen baldintza zurrunekin nazkatuta, iPhone eta iPadetarako zeukan aplikazio propioa garatzeari utzi eta web bidezko beste bat sortu zuen haien ordez. Horrela salmentak eta harpidetzak berak nahi duen moduan egin ahal izateko.

Bada, gaur bertan jakin denez, orain Amazon liburudenda erraldoia da bide horri jarraituko diona. Applek ezartzen dizkion baldintzei erantzun ezinik, aplikazioa utzi eta webapp delakoa sortu du, Google Chrome zein Safari nabigatzailetik erabil daitekeena, iPhone, iPad, Mac, Windows zein GNU/Linux duten ordenagailuetan. Kindle Cloud Reader izenaz bataiatu dute. Irakurri dugunez, iPadean oso ondo funtzionatzen du, eta Macean behintzat polito dabil (nahiz eta eskertuko litzatekeen Firefoxekin ere erabili ahal izatea!).

Amazonen, eta Financial Times-en erabakiak ulertzeko, Applek bere dendaren bidezko salmentak egiteko jartzen dituen baldintzak ulertu behar dira. Bere garaian e-gor lagunak argitu zigunez, hona esanguratsuenetako batzuk:

• App Store bidez egiten diren salmenten %30 Applerentzat da. (10 euroko harpidetza salduz gero, 3 euro Applerentzat).
• Erosleen datuak Applek kudeatzen ditu, ez saltzaileak (pentsa zer den hori negozio nagusia salmenta duen Amazon batentzat zer den!).
• Saltzaileak ezin du produktu bera (harpidetza, liburua) App Storetik kanpo merkeago saldu, ezta erosketa Storetik kanpo egiteko estekarik eskaini

Total, Amazonek ere erabaki duela baldintzak gehiegizkoak direla. Aurrerantzean, Kindle aplikazioaren ordez, webapp bat erabili ahal izango dute Amazonen bezeroek (webgune ‘aktibo’ bat, nolabait esateko), lehen programatxoarekin egiten zuten dena egiteko: liburuak irakurri, erosi, eta abar… Appleren arau zurrunetatik kanpo.

Sagartxoaren lagunak, beraz, hardware esparruko lehiakideak itotzen saiatzen ari dira, batetik, eta bestetik, bere plataforma erabili nahi duten eduki hornitzaileak ere estutu eta estutu dabiltza, handienek harengandik ihes eragiteraino. Argi dago orain arte oso ondo funtzionatu diola jokabide horrek Jobsi, baina luzaro eusteko modukoa al da? Nik neuk gero eta zalantza handiagoak ditut.

OHARRA: Sustatun irakurri dugunez, badirudi Amazonek arrazoi bat baino gehiago duela Appletik ahalik eta urrunen ibili nahi izateko…

'Jenio' handikoa omen da Jobs... zentzu bat baino gehiagotan...

Bi hauek dira Applek gero eta errazago pizten duen antipatiaren azken bi laginak:

Lehiarik? Ez eskerrik asko!

Cupertinoko enpresa gerra deklarazioa egin die Android sisteman oinarritutako telefonoak egiten dituzten enpresa nagusiei. HTC, Motorola eta, batez ere, Samsung. Australian antzeko kasua irabazi ostean, Applek iPadaren lehiakide zuzena den Galaxy Tab 10.1 tabletaren salmenta blokeatzea lortu du, Korearrek Appleren hainbat patente urratu dituztela argudiatuta. Jakina denez,urtea hasi zenetik hona gero eta arinago ari da hedatzen Android gailuen erabilera, eta Applek interes bizia du antzezlan horretan izarra izaten jarraitzeko.

Are gehiago, HTCren aurkako auzian argi eta garbi adierazi dutenez, Appleren patenteen urraketa Android sistemak berak egiten omen du, eta Jobsen abokatuak ‘gogotsu’ saiatuko dira beren patente ditxosozkoak defendatzen. Kontua zertan den jakiteko, hona Applek artxibatuta dituen (eta Androidek ‘baimenik gabe erabiltzen dituen’) patenteetako bat: “System and method for performing an action on a structure in computer-generated data” du izena. Gutxi gorabehera, itzulpena litzateke: “Egituretan ekintzak gauzatzeko metodo eta sistema ordenagailuz sortutako datuetan”.

Applek ‘Data Detectors’ izen komertziala eman zion teknologia horri, 1996-97an kaleratu zuenean. Garai hartan berrikuntza handia zen, baina gaur egun nahiko zabalduta dago: hari esker, testu dokumentu batean lan egiten ari garenean, esaterako, e-mail helbide baten gainean klik egitean sistema eragilea ‘jabetu’ egiten da klikatu duguna e-mail helbidea dela, eta posta programa automatikoki zabaltzeko aukera ematen digu; data baten gainean klik egitean berriz, egutegian hitzordu berri bat sortzeko aukera eskaintzen digu, URL bat bada, web arakatzailera eramaten gaitu… Bada, Appleren arabera, berak asmatutako sistemaren oso antzekoa erabiltzen du Androidek, eta beraz bere patentea urratzen ari da.

Txarrena da, ustez behintzat, badirela aurrekariak: zurrumurruek diotenez, HTCk dagoeneko 5 dolarreko ‘lizentzia’ ordaintzen dio Microsofti saltzen duen Android gailu bakoitzeko, dirudienez Microsoften hainbat patente ere urratzen dituelako. Kontan hartu behar da Microsoftek, besteak beste, ‘klik bikoitza’-ren patentea duela.

BIgarren albistea ere hemn bertan jarri behar nizuen.. baina aizue, nahiko sarrera luzea idatzi dut dagoeneko blog bat izateko, ezta?

GEHIAGO IRAKURRI NAHI…?

Microblogging plataformako arduradunek diotenez, horrelako aplikazio blokeoak ohikoak izaten dira segurtasun edo baimen kontuak direla medio, baina oraingoa larriagoa izan da, blokeak erabiltzaile pilo bati eragin diolako. Twitterrek dioenez, hiru aplikazioek segurtasun arazoak eta plataforma erabiltzeko hainbat gidalerro urratu omen dituzte, besteak beste:

• pribatutasun arazoak 140 karaktere baino gehiagoko mezu pribatuekin
• aldaketak erabiltzaileek sortutako edukietan dirua irabazteko asmoz
• twitter marka erabiltzeko baimenen urraketak

Beste ezer gutxi aurkitu dut hor zehar kontu honen inguruan, baina esango nuke, Twidroyd-i dagokionez, 5.0 bertsio berrian mezu luzeegiak tmi.me zerbitzua erabiliz automatikoki laburtzeko aukera gehitu izanak ekarri duela arazo nagusia. Erabiltzaileen arteko mezu zuzenak twitter ez den plataforma batetik prozesatuz gero, mezu horien pribatutasuna ezbaian geratzen da, eta seguruenik hori izango da Twidroyd blokeatzeko arrazoi nagusia. Mezu luzeak laburtzeko aukera hori defektuz gaituta dator Twidroyd 5.0 bertsioan.

Badirudi arazoa behin-behinekoa dela, eta Twidroydeko jendeak dagoeneko esana du laster egongo dela eskuragarri arazoak konpontzen dituen bertsio berri bat. (Arazo larria izango lukete bestela, kontuan izanda erabiltzaile askok aplikazioa ordaindu egin dugula).

Bien bitartean, Twitterek bere aplikazio ofiziala erabiltzeko aukera eskaini digu kaltetuoi. Eta horregatik bada jokaldi hau guztia aplikazio horren erabilera areagotzeko maniobra bat besterik ez dela pentsatzen duenik…

Baina… nola jakin daukagun telefonia plana egokiena den ala ez? Eskaintza, tarifa, azpitarifa, sustapen eta kontrasustapen guztiekin, nola jakin zein den merkatuan gehien komeni zaigun prezio plana? Zaila da jakiten, baina beharbada gaur aurkeztu nahi dizuedan tresnatxo honek lagunduko dizue.

MyPlan du izena, eta Android sistema eragilerako doako aplikazio bat da. Merkatuan dauden tarifen taulak hartu, zure telefonoko benetako deiei aplikatu, eta zerrenda bat egiten du, merkatuko tarifa bakoitzarekin gastatuko zenukeena adieraziz. Uneko zure tarifa ere irteten da zerrenda, eta beraz konparazioa erraz-erraz egin dezakezu batetik eta, bestetik, zure gastu erreala kontrolatzeko aukera on da aldi berean.

Deien estatistika ere egiten du: nori deitu diozun, zenbat denboraz hitz egin duzun. Gainera kontaktu bakoitzak zer operadorerekin funtzionatzen duen ere zehaztu dezakezu, horrela deien kostua zehatzago kalkulatu ahal izateko.Oso-oso tresna interesgarria,  erabilgarria, eta gainera dohainik!

Telefonoan bazaude, deskargatu hemendik, eta bestela erabili ondoko QR kodea

Ez horregatik!

1. 

   Oker ez banago, horrelako muñekito bat ere zozkatzen dute El Androide Librekoek

   TXARRA: HTC-k ofizialki iragarri duenez, Hero telefonoek aspalditik garrasika eskatzen duten Android 2.1 eguneratzea berriz ere atzeratuko dute, ekainera arte. Ez dago azalpen ofizialik 2009ko azarotik hona eguneratze horren inguruan izan den saltsa azaltzeko, baina nago  zerikusi zuzena duela HTCk azken hileotan atera duen androidun modelo berri piloarekin, eta horiek saltzeko beharrarekin, noski.

   Eguneraketa zergatik nahi dugun galdetzen duzuenontzat: hori barik ezinezkoa da, esate baterako, bluetooth bidezko artxibo trukerik egitea, edo aurikularrak ez diren bestelako gailuak erabiltzea (haririk gabeko teklatua, esate baterako).

2. ONA: Mundua ez da amaitzen HTC Hero horretan. Googleren Nexus One delakoak ere oso itxura ona du eta orain, aukera dago horrelako bat dohainik eskuratzeko El Androide Libre komunitatearen zozketaren bidez. Zozketan parte hartzeko derrigorra da haiek aipatzea blog sarrera batean eta, tira, proba egin beharko, ezta?

Horixe ba. Hurrengora arte

Gozo jarri zaigu Jobs iPad famatuaren kontuarekin!

Batetik, Steve Jobs bera daukagu. Cupertinoko gurua bere egoera fisikoaren eta Appleren gaineko lidergoaren inguruko zalantzak argitu nahian omen dabil, eta lehengoan Appleko langileekin izandako bilera batean, egurra partitzen ibili zen, Amazonia osoa ordu erdi batean goitik behera desforestatzeko beste:

• Googleren inguruan, suabe hasi zen Jobs: Apple bilatzaileen munduan sartu ez den arren, Google telefonoen merkatuan sartu dela buru-belarri Nexus One delakoarekin, iPhonea ‘hil’ eta merkatu hori bereganatzeko asmoz, eta ez duela batere asmorik Googleri aitzindaritza hartzen uzteko. Bide batez, eta bertan egondako langileek ei diotenez, Googlek darabilen “ez izan gaiztoa” leloaz “is a load of crap” esan omen zuen Jobsek. Kakamokordo bat dela, alegia.
• Baina Google ez da Jobsen haserrea pairatu duen bakarra. Adoberen kontura ere bereak eta bi bota ditu, esanez alferrontzi hutsak direla. Sekulako gauzak egiteko ahalmena dutela, baina ez dutela lanik egin nahi. Appleren gailu mugikorrek Flash euskarririk ez izatea Adoberen errua dela esan omen zuen Jobsek, “errorez josita dagoelako, Mac bat kolgatzen den gehienetan, Flashen errua izaten da”. Gainera, mundua HTML5erantz mugitzen ari dela ere esan zuen Appleren sortzaile eta buruak, eta laster ez dela Flashen beharrik izango.

Bien bitartean, Adobeko jendea ez da isilik geratu, noski, eta iPad-ak Flashik ez izatearen ondorio praktikoei buruzko sarrera bat egin dute euren blogean.

Milioika webgunek erabiltzen dute Flash. Hasi ohitzen lego fitxa urdina ikustera...

Acer etxearen Taiwango adarra zuzendu arren, Bilbokoa ematen duen Scott Lin-ek bere aldetik, esan du iPadaren antzeko gailu bat diseinatzeak ez duela batere zailtasunik bere enpresarentzat. Acer liderra da netbooken salmentan, eta Lin-ek esan duenez, ez du batere asmorik iPadarekin lehian sartzen saiatzeko. Linek ez du espero iPad eta netbook merkatuaren artean lehia handirik egotea.

Googlekoek ez dute ezer esan momentuz (nik dakidala behintzat), baina honela jarraituz gero, norgehiagoka honen inguruko apustuak kiroljokoa.com-en ere egiteko modua izango dugu laster!