TwiggyMac-a, oso-osorik. Argazkia: wozniac@eBay

Apple Macintosh-ak forma ezberdin ugari izan zituen Jef Raskin-ek irudikatzen zuen teklatua pantaila eta inprimagailua gailu bakar batean biltzen zituen 500 dolar inguruko kontzeptutik, 1984an zeremonia handiz  prezio boskoitzarekin aurkeztu zen azken produktura iritsi arte. Mac garapenaren garai batean, egintzat ematen zen ordenagailuak Appleren 5,25 hazbeteko Twiggy diskete unitatea eramango zuela, Mac-aren amonak ere, Lisak, huraxe erabiltzen baitzuen.

MacTwiggy, eskuman, eta ezkerrean amonatxo Lisa. Argazkia: wozniac@eBay

Twiggy unitateek 860Kb arteko kapazitate zirraragarria zuten eta, harekin batera, huts egiteko joera aparta ere bai. Kronikek diotenez, unitateon funtzionamendua hain zen eskasa ezen garatu zuten ingeniarien buruak liskarra izan zuen Steve Jobsekin, azken hori Twiggy erabiltzen jarraitzen tematuta zegoelako: “atera zure .45 eta akatu behingoz zaldi madarikatua!” esan omen zion Jobs-i, formatuaren agoniarekin amai zezan. Azkenean, halaxe egin zuten, eta jatorrizko Macintosha Sonyk egindako 3,5 hazbete eta 400Kb gordetzeko ahalmena zuten diskette ‘ez hain malguekin’ merkaturatu zen.

Tira, ba kontua da, Twiggy unitatea daraman Mac 128k prototipoa agertu dela enkantean eBayn. Abioko prezioa 99.995 dolarrekoa (76.000 euro pasatxo) dela kontuan izanda, ez dut uste erosteko moduan dagoen inor ezagutzen dudanik. Baina tira, argazki ederrak jarri dituzte gutxienez, kuriositate zientifikoa izan dezakegunontzat. eBayko enkante orrian bertan ikus ditzakezue, edo bestela honen berri jaso dudaneko Engadgeten galerian.

[via: Engadget]

Seguru behin baino gehiagotan pentsatu duzuela: bale, oso polita nire telefono aurreratua, oso ikusgarriak errealitate hedatua erabiltzen duten aplikazioak… baino balio-balio… zertarako balio dute?

Lasai, hemen nator balizko fede-krisia konpontzera, ideia sinple bezain on batekin: sakelakoak eta errealitate hedatua uztartzen dituen iOnRoad Android sitemarako aplikazioa.

HAISUEK, TXOKATUKO SARELA!!!

Aplikazioak gure segapotoko kamera eta GPSa erabiltzen ditu errepidea ‘ikusi’ eta parean ditugun oztopoetatik zenbateko distantziara gauden kalkulatzeko. Horrez gain, erabili ahal izateko telefonoa jartzeko euskarria behar dugu haizetakoan. Aplikazioa, gainera, bigarren planoan izan dezakegu zabalik musika entzun edo GPS nabigatzailea erabiltzen dugun bitartean.

Eta orain, onena: probatu nahi izanez gero, beta bertsioa dohainik eskura daiteke momentuz, garatzailearen webgunetik. Hori bai, kontuan izan, ofizialki behintzat, honako gailu hauetan soilik funtzionatzen duela:

• Samsung Galaxy S II
• LG Optimus 2X
• HTC ThunderBolt 4G
• Google Nexus S
• HTC Incredible S

Nirea ez da horietako bat ere, baina tira, probatu egin beharko ezta?

Mac OS X erditze luuuze baten ondoren jaio zen. 1990eko hamarkadan, Applek gorriak ikusi zituen, Mac ordenagailu eskaintza desordenatu eta garestiegia eta, batez ere, Mac haiei bizitza ematen zien Mac OS sistema eragilearen zaharkitzearen ondorioz. Oinarrian 1984ko Macintoshen sisteman oinarritzen zen garai hartako Mac OS sistema, petatxoak bata bestearen gainean ezarrita. Txarrena memoriaren kudeaketa zen: sistemak memoria esparruak babesten ez zituenez, nahiko zen aplikazio batek errorea ematea sistema eragile osoa kolgatzeko. Arazo hori areagotu egin zen Mac OS 7.5etik aurrera, sistemak generazio zaharreko Motorola 68k eta PowerPC erakoei euskarria eman behar zienean.

Mac OS 7.5en erabiltzaileo torturatzen gintuen mezua: Error Tipo 11

Arazo horiek ikusita, Apple generazio berriko sistema eragile bat sortzeari ekin zion. Sistema modernoa nahi zuten, memoria babestua zuena, aplikazio batek huts egitean osorik jausiko ez zena… eta Mac OSen betiko erabiltzaile esperientzia atsegina emango zuena. Copland ezizena jarri zioten proiektuari… …eta hainbat aldiz huts egin ondoren, ideia bertan behera utzi behar izan zuten Cupertinon.

BeOS, garai batean Mac OSen ordezko segurutzat jotzen zena

Sistema berriaren beharra gorria zen, hala ere, eta Apple inguruan bilatzen hasi zen, sistema hirugarren bati enkargatu edo erosteko asmoz. Hautagai nagusiak hiru ziren:

1. urte batzuk lehenago Applen bertan aritutako Jean Louis Gasseék sortutako BeOS, garai batean irabazle ziurtzat ematen zena; hain ziurtzat ezen Gasseé harroegi jokatzen hasi zen Appleren aurrean, harik eta Apple nekatu eta Be enpresa antzarrak ferratzera bidali zuen arte.
2. BIgarren aukera… horreur! …Microsoft bera zen! Gates prest zegoen Windows NTren bertsio bat egokitu eta Appleri saltzeko, eta negoziazioak oso-oso aurreratuta izatera ailegatu ziren, Applek hirugarrenaren alde egin zuen arte.
3. Appletik urte batzuk lehenago kaleratu zuten Steve Jobs, eta hark beste informatika enpresa bat sortu zuen, NEXT izenekoa. Ordenagailu propioak egin zituen garai batean, baita haientzako sistema eragilea. Zaila izan zen, batez ere Jobsek ez zuelako ezer jakin nahi kaleratu zuen enpresaz, baina azkenean Applek NEXT erosi eta haren sistema eragilea, NEXTSTEP, Appleren txapaypinturatik pasa eta Mac OS X bihurtu zen.

NeXT CUBE, gaur egungo MacPro-en aitona

Mac OS Xen jaiotzak espektazio handia sortu zuen. Hilabete batzuk lehenago, Applek beta publiko bat jarri zuen salgai. Haren sorpresarik ikusgarriena erabiltzaile interfazea zen. Aqua deitu zioten, eta ordura arte ikusi gabeko estetika zaindua zuen: lehio eta menu gardenak, kolore biziak, ordura arteko sistema grisetatik oso urruti… Jobsek aurkezpenean esan zuenez ‘ikustean miazkatzeko gogoa ematen duen interfazea sortu dugu’.

Hori bai, Mac OS X 10.0 hura oso kritikatua izan zen, gauza asko eta asko baizituen hobetzeko

• Multimedia euskarria guztiz garatu gabe zegoen: Mac OS Xen multimedia funtzioak kontrolatzen dituen QuickTime guztiz garat gabe zegoen, eta beraz ez zegoen DVDrik ikusterik, esaterako. Askotan oso motel funtzionatzen zuen, sistemaren kodeak artean zeukan ‘debug’ kode bolumenaren ondorioz…
• Interfazea oso ezberdina zen Mac OS 9tik, eta hartan sarri erabiltzen ziren hainbat gauza (Sagarraren menua pertsonalizatzea, esaterako, ezinezkoak ziren).
• Horrenbeste kolorinekin, diseinu alorreko maczaleak berehala hasi ziren kexatzen: interfazeak distortsio gehiegi sortzen zuen koloreak xehetasun handiz bereizi behar dituztenentzat.

Zorionez, Mac OS Xek ‘Classic’ ingurua zekarren, Mac OS 9 emuladore moduko batean exekutatzeko softwarea. Horrela, sistema berriarekin inkonpatibleak ziren aplikazio gehienak erabiltzen jarraitzeko modua bazegoen….

Hain zuzen ere, Classic inguru hori da hamar ute hauetan galdu den funtzioetako bat. Denborarekin, Mac OS X helduago egin zaigu, kolorintxuak alde batera utzi eta askoz ere irudi sobriagoa du orain. Ea zer sorpresa datorren 10.7 bertsioarekin, itxuran behintzat aldaketa handia ekarriko dituela ematen du eta….

Esango nuke laneko ordenagailuen %60an eta lagunen PC ‘domestikoen’ %95ean ikusi dudala mezu hori azken hiru-lau hilabetetan. Badirudi Windows XPren KB905474 eguneraketa dela sisteman txibatoa sartzen duena eta beraz kontuz ibili eguneraketak instalatzean!

Nik ere sufritu dut KB905474 horren ondorioak, Macintoshean VMWare bidez noizean behin erabiltzen dudan Windows XP Pro-ren kopian. Atzo bila ibili nintzen, ea soluziorik dagoen eta, efektibamente, egon badago, erraz askoa gainera. Hona ‘heriotzaren izarra’ desagertarazteko egin beharrekoak:

• Testu soileko dokumentu bat sortu
• Ondoko testua idatzi dokumentu horretan:

taskkill /im wgatray.exe
Del c:\Windows\System32\WgaTray.exe
Del c:\Windows\System32\dllcache\WgaTray.exe
echo Windows Registry Editor Version 5.00 >%temp%\WGANFIX.REG
echo. >>%temp%\WGANFIX.REG
echo [-HKEY_LOCAL_MACHINE\SOFTWARE\Microsoft\Windows NT\CurrentVersion\Winlogon\Notify\WgaLogon] >>%temp%\WGANFIX.REG
regedit /s %temp%\WGANFIX.REG
del %temp%\WGANFIX.REG
del c:windows\system32\wgalogon.dll
del c:windows\system32\dllcache\wgalogon.dll

• Gorde testu hutseko artxiboa, nahi duzun izena eta .bat luzapena jarrita
• Egin bi klik sortu berri duzun artxiboaren gainean exekutatzeko
• Berrabiarazi ordenagailua
• Listo! Aio izar maiteaaaaa…

Niri, esan bezala Windows XP Pro batean ondo joan zait metodo horrekin, kopipega egiten ibiltzeko gogorik ezean, hemen eskegi dizuet nik sortutako .bat artxiboa, erabiltzeko prest. Gogoratu, hala ere, tentu handiz ibili behar dela aktualizazioekin, batzuetan tranpa dakarte eta!

Ale, on egin!

12 aplikazio, 39 dolarretan

Aste honetan bertan jarri da martxan MacHeist Mac software eskaintzaren hirugarren edizioa. Shareware erako aplikazioak sustatzea eta, bide batez, AEBetako zenbait erakunde ‘humanitario’-rentzako laguntza lortzeko helburua duen ekimen honen funtsa oso sinplea da: Mac sistemarako 12 shareware aplikazio erakargarriz osatutako paketea eskaintzen da, ohi baino *askoz ere* prezio merkeagoan. Trukotxoa ere badu, noski: aplikaziorik garesti edo desiratuenak pakete osoaren salmenta kopuru jakin batetik aurrera baino ez dira desblokeatzen: momentu honetan, esate baterako, 12 aplikazioetatik lehen bederatzietarako lizentzia eskura daiteke jadanik 39 dolarren truke. Salmentak kopuru jakin bat lrtzen duenean, orduan jasoko dute erosleek hamargarren aplikazioaren lizentzia.

Interesa izan dezakezuenontzat, hona 12 aplikazioen errepaso arin-arin bat:

World of Goo jokoa, benetan adiktiboa

• iSale, eBayko salerosketak erraz kudeatzeko aplikazioa (39,95$)
• Picturesque, argazkiei efektu ikusgarriak arin eta erraz aplikatzeko programatxoa (34,95$)
• SousChef, errezetak gorde eta partekatzeko programa (30$)
• World of Goo, azken boladan oso modan jarri den joko sinple baina adiktiboa (lehen eskutik diostsuet!!!) (20$)
• PhoneView, iPhonea dutenentzako tresna erabilgarria (19,95$)
• LittleSnapper, pantailako (eta webguneetako) argazkiak hartu eta partekatzeko tresna (39$)
• Acorn irudi editore sinplea (49,95$)
• Kinemac, 3D animazio sinpleak sortzeko aplikazioa (299$)
• WireTap Studio, ordenagailuko audioa grabatzeko eta editatzeko aplikazioa (69$)
• BoinxTV, zuzeneko bideo editore ikusgarria, ordenagailua ‘telebista estudio osoa’ bihurtzen duena (199$) – oraindik desblokeatu barik
• The Hit List, ataza kudeatazailea (69,95$) – oraindik desblokeatu barik
• Espresso, web editore berritzailea (80$) – oraindik desblokeatu barik

Berez 627 dolarreko software bilduma… 39 dolarretan soilik!!! Pagotxa ederra, ezta? Ba ez pentsa hor amaitzen denik! Egunotan MacHeisten webgunea bisitatzen duen orok, DOHAINIK deskarga dezake EventBox aplikazio berria, sare sozial ezberdinetako mezuak leiho bakar batean erakusten dituena.

Erostera animatzen bazara, egizu lotura honetatik, eta horrela aplkazio estraren bat irabazten ere lagunduko didazu. Izan ere, behin zure paketea erosiz gero, beste bi lagun komentzitzen badituzu gauza bera egiteko, jokotxo bat eta utilitate sorta bat ere lortzeko aukera ematen dizu MacHeistek!

Click here to view the video on YouTube.

Flipantea, ezta? Ba ez pentsa sistema hori errealitatetik oso urrun dagoenik. Izan ere, Minority Report egiteko Spielbergek teknologi ahaolkulari gisa kontratatu zuen Oblong enpresak G-Speak izeneko interfazea aurkeztu berri du. Gaur egungo teknologiak ahalbidetzen duen pelikulako sistema horren ahalik eta antzekoena. Egileen arabera, sistemak “sareko eta mundu errealeko pixelak konbinatzen ditu”. Onena, zuen begiekin ikustea:

Via Engadget

Ederra... ...baina pozoitsua?

Bada , gaur bertan Libération egunkari frantsesak argitaratu duenez, Mac Pro horien usaina oso toxikoa izan liteke. Dirudienez, CNRSko biologo molekular batek arazo larriak izan zituen bere Mac Proaren puzkerren ondorioz: begien eta laringearen irritazioa, hazkura eta abar… Appleren erantzun falta, eta arazoa erabiltzaile askorena zela, ikusita, makinak isuritako gasen lagina bildu eta Greenpeacerako lan egin ohi duen Analytika laborategietara bidali zuen, azter zezaten.

Emaitza, beldurgarria benetan: laborategiko analisiek(PDF) ez bat, ez bi eta ez hiru; ZAZPI osagai toxiko aurkitu zituen zientzialariak bidalitako lagin horretan, tartean estirenoa eta benzenoa. Azken horren erabilera guztiz debekatua edota zorrotz-zorrotz mugatuta dago ia mundu osoan, ondo ezaguna baitira haren ezaugarri kartzinogenoak.

Applek ez du tutik ere esan kontu honen inguruan, baina arazo handiak izan litzake orain egiten ari den bigarren analisiaren emaitzek gai toxikoon presentzia berretsiz gero. Sonyren bateria lehergarrien kontua hutsaren hurrengoa litzateke Mac Pro ezagun (eta garestietako) batzuek behintzat aukera asko dituztela erabiltzaileari minbizia sortzeko.

Honezkero definitiboa da: Appleren kalitate kontrolak ez dira garai batean bezalakoak. (Kontatu dizuet otsailean erositako MacBook Pro ustez goreneko kalitatekoarekin dudan arazotxoa?). Gauzak horrela badoaz, askok amaituko dugu Joxe Arantzabalen (edo Jabi Zabalaren) bideari jarraituz!

Via: Hardmac.com

Ukan eta bere lagunak, Diario Vascoren argazki batean

«Lo digo sin prepotencia: creo que es la primera vez que una campaña de promoción del euskera logra un eco masivo». Patxi Baztarrika Hizkuntz Politika Sailburuordeak dixit. Halaxe izango da akaso, ez dakit; baina, teknopatia kontuetara etorrita, ezin esan (tamalez), pixkabatesmuchorekin lotuta uda hasieran aurkeztu zen kanpaina, klik egin euskarari delakoa, izugarrizko arrakasta masiboa izan denik.

Ekainaren 26an jarri zen martxan klik egin euskarari. Behin eta berriro azaldu zitzaigunez, informatika enpresek (Microsoftek, batez ere) antolatutako kanpaina zen, eta Jaurlaritzaren ekarpena babes morala eta Ukan birusaren irudia besterik ez zen. Kanpainaren ardatzetako bat Windows eta Microsoft Office euskaratzeko maratoia zen. Are gehiago, Microsoft Españako Rosa Garciaren hitzetan, Windows XP euskaratzeko paketeak 50.000 deskarga izan zituen, eta maratoiaren helburua marka hori haustea zen.

Bide txarrean goaz, bada, marka hausteko kontuetan… oraintxe bertan egin diot kukutxo bat kanpainarako jarritako deskarga zenbagailuari eta… ekainaren 26tik hona (bi hilabete eta erdi)… 1688 aldiz baino ez da deskargatu Vista eta Office euskaratzeko paketea.

75 egunetan, 2.000 deskarga baino gutxiago. Zenbat linuxzale Euskal Herrian!!!

Datua penagarria da, edonondik begiratuta ere. Interpretazio baikor bakarra bururatzen zait niri: jendeak oso arin bereganatu ditu erakundeak enpresa pribatuen produktuak diru  publikoaz lau haizetara sustatzen ibiltzearen aurkako argudioak, eta GNU/Linuxera pasatu dira ordenagailu erabiltzaile euskaldun guztiak, sistema osoa euskaraz, dohainik eta ganoraz izateko.

Izan ere, azalpena aurreko hori ez bada, alternatibak triste baino tristeagoak dira eta. Zergatik izan dituzte hain deskarga gutxi Vista eta Office berriak euskaratzeko artxibo horiek? Hona niri bururatzen zaizkidan arrazoietako batzuk, orden zehatzik gabe:

• Erabiltzaile euskaldun gehienok ordenagailua lanean baino ez dugulako erabiltzen, eta han ezin dugulako ezer instalatu.
• Etxean erabilita ere, deskargatzeko prozedura hain korapilatsua delako (eta horrenbeste segurtasun egiaztatze behar dituelako) ezen azkenean errazagoa baita Ubuntu osoa deskargatu eta instalatzea.
• Kanpainaren komunikazioa hutsaren hurrengoa izan delako.
• Windows + Birusa batuketak ez diolako inori batere lasaitasunik ematen, birusa munduko jatorrena, euskaldunena, disenuzkoena eta pixkabatesmuchoena bada ere.
• Vista ez duelako inork erabiltzen, mundu guztiak XPrekin jarraitzen du eta.
• Erabiltzaile euskaldunek, Luistxo Fernandezek bezalaxe, euskarazko jana nahiago dutelako, menuak baino.
• Uda hondartzara joateko delako, eta ez pantaila aurrean klik-klik-klik ibiltzeko.
• Euskaldun jatorrek ez dutelako ordenagailurik ibiltzen.

Lagunduko didazue argitzen? Zer gehiago bururatzen zaizue horren deskarga gutxi egoteko? Eta, batez ere, zer ondorio izan dezake honek euskarazko software jabedunaren munduan?