Teknopataren txokoa » Photoshock

Pacman nafarra da

joxe — Mon, 29 Aug 2011 12:40:36 +0000

Baietz ba, Japonian asmatu zutelako kontu hori gezur borobila da, prentsa arrosa urruti mantentzeko amarru bat!

Ikusi, ikusi zer deskubritu nuen aurrekoan Orbaitzetako Larraun auzoan, Iratiko basora bidean!

Ze fuertea, ezta?!?

Pepsi, txakolina baino bertokoagoa

joxe — Sun, 17 Jul 2011 21:22:00 +0000

Ostiral arratsaldea. Beste edonon egotea nahiago, baina erosketa handi samarra egin beharra eta, tira, goazen Bilbondora.

Bertako Eroskian, “Euskadiko produktuei” esklusiban dedikatutako apalategi piloa. Euskal Okela, Idiazabal Gazta, Gernikako piperrak, eta edarien artean: tatxan! Pepsiren 375 mililitroko lata berriak!!!

Euskaldunok nahi dugun lekuan jaiotzen garela!!!

Kopiapega

joxe — Mon, 13 Jun 2011 08:00:53 +0000

Aurrekoan esan nizuen ba: gehiagotan joan behar dut Bilbora, joaten naizen bakoitzean harritu egiten naizelako. Joan den ostiralean han lan egitea tokatu zitzaidan, eta enkargutxo batzuk egiteko ere aprobetxatu nuen. Interbiakera joan nahi nuen, A8a erabiltzeko deskontua eskatzera. Lehen ezustekoa izan nuen han: harrera zegoen gizonak tutik ere ez zekien euskaraz, baina muturtu ordez, euskaraz hasi nintzaionean berehala “espera, espera” esan eta lankide euskaldun baten bila sartu zen, irribarre batekin. Badakit gutxirekin konformatzea zela, baina haren jarrerak goiza alaitu zidan.

Haren jarrerak, eta gero kalean egin nuen aurkikuntza bat. Bilbon zabiltzatenok ezagutuko duzue San Inazio auzoan dagoen eraikin erraldoi hau, post-desarrollismoaren seme kuttuna:

Inguru horretatik aspaldi pasatu gabe nengoen, eta arreta eman zidan fatxada zaharberritzeko egin duten ahalegina. Nik horma gris erraldoia nuen gogoan, eta oraingo kolore konbinazioak toke berezi bat ematen dio hala ere kankailu samarra den blokeari.

Paretik pasatzean, perspektiba bitxi samarrak lortzen dira. Irudi hau esaterako: erdiko eskilara horrek irreala dirudi, ilusio optikoa edo horrelako zeozer…

Bada, besteren bat ere nirekin ados dago, eta irribarrea atera zidan graffitia egin du eskailerako pisu guztietan, ikusi, ikusi:

Ikusten? Argazkian ez da ondo sumatzen, baina baten batek ctrl+v dioen graffitia erantsi die pisu guztiei. Izan ere, inpresio horixe ematen baitu eraikinak: pisu guztiak Photoshopekin kopipega eginda sortu direla… Baietz ona?

Ezusteko atsegina

joxe — Wed, 18 May 2011 22:16:22 +0000

Gero eta gutxiagotan ibiltzen naiz Bilbon. Eta pixkanaka-pixkanaka igertzen noa gero eta ~~arrotzagoa~~ harrigarriagoa egiten zaidala. Bertatik pasatzen naizen bakoitzean topatzen dut ahozabalik uzten nauen zeozer. Lehengoan kartel hau izan zen shocka eragin zidana:

QR Codeak euskal kartelgintzan?!? Hamaika ikusteko jaio gara!!!

Disko osoa online entzun daiteke... ... segapototik zuzenean! o.O

Gure horma, faroletan eta abarretan hainbestetan ikusi dugun ohiko kartel horietako bat, kasu honetan Siroka musika taldearen azken lana, Karosi, iragartzekoa (izugarria da zelan hedatzen ari den palindromozaletasuna, ezta?). Aitortu behar dut gero eta kasu gutxiago egiten diedala halakoei, oso bereziak izan behar dute nire arreta deitzeko. Eta honek lortu du bada, ni parean gelditzea!

Ohiko irudia edo titulu handiaren ordez, QR Code handi-handi batek hartzen du kartelaren zatiaren handiena. Eta azpian testu bat (badaezpada ere, jeje): “irakurri kode hau zure segapotoarekin eta entzun edo deskargatu gure azken diskoa”. Halaxe egin dut bada, Barcode Scanner aplikazioa ireki, kartelari argazkia atera, eta hauxe agertu zait pantailan: bigarrenez jarraian ahobete hortz utzi nauen webgune bat, sakelako gailuetarako beren-beregi atondua, disko osoa entzuteko, bytheface deskargatzeko, edota disko-liburu formatuan erosteko aukera ematen duena. Txukun asko eta inolako arazorik gabe. Berez gauza sinplea, bai, baina zer nahi duzue esatea, niri arratsaldea alaitu dit!!!

Zorionak, bada, Sirokako lagunei ideiagatik, baita ideia gauzatzeko era txukunagatik… eta irakurleoi, tira, irakurri goiko argazkia zuen QR aplikazioekin eta esango didazue zer iruditzen zaizuen diskoa!

Frantsesek ere kopia piratak

joxe — Wed, 04 May 2011 23:18:05 +0000

Parisen pasa ditut egun batzuk oporretan. Oso hiri polita da, esango nuke bisitaria harrituta uzteko pentsatuta dagoela beren-beregi: etorbide zabal-zabalak, artez jositako eraikin eta kaleak. Hori bai, turistaz josita dago, edonora joanda ere… eta zeozerk esaten dit hori edozein garaitan joanda ere gertatzen dela.

Enfin, gauza batek harrituta utzi nau Parisera egiteko bisitan. Nik uste nuen produktu eta marka ezagunen kopia piratak txinatarren gauzak zirela batez ere. Baina hara zer aurkitu dudan Frantziako hiriburuko informatika denda baten atarian:

Indignatuta, denda barrura ez sartzea erabaki genuen, noski. Seguro honelako gauzak saltzen dituztela:

HiPad II salduko ote dute Appel dendan?

Zer esango luke Steve Jobsek ikusiko balu?!?

Garai txarrak Applerentzat

joxe — Thu, 22 Jul 2010 21:02:46 +0000

Garai txarrak bizi ditu Steve Jobsen konpainiak: langileen baldintza kaskarrak eta suizidioak, Adoberekiko tirabirak Flash dela eta , iPhone 4ren antenaren auziak, enpresak erabiltzaileen kexei emandako erantzunak (arazoa ukatuz hasieran, erabiltzaileen abilezia faltaren ondorioa zela iradokiz, gero, eta azkenik, ‘beste batzuek ere badutela’ esanez) irudi arazo larria ekarri diote beste edozeren gainetik iruditik bizi diren sagartxoaren konpainiari. Horren adierazgarri ezin hobeak aurkitu ditut azken egunotan. Lehenengoa, Taiwanetik datorren bideo satiriko epiko hau:

Eta bigarrena, hurbilago aurkitutakoa (Barakaldoko IKEAn, hain zuzen ere), eta iritzi publikoak Appleri buruz duen irudiaren adierazgarri argi eta garbia. Horratx:

Äpplekaka, IKEAn ere konturatu dira honezkero!!! Jobsek larri ibili behar du!!!

Horixe bai: garai txarrak Applerentzat

Usoak pasa, sareak heda

joxe — Fri, 15 Jan 2010 15:26:49 +0000

Egin kontu taberna, bulego edo eraikin ofizial bat daukazula, eta dena delakoagatik, jendeak beeeeeeti aparkatzen duela zure atean, bezero, langila edota funtzionario eta ‘herritarren’ sarrera-irteera oztopatuz.

Egoerarekin nazkatuta, enpresa bati (edo obren brigadari) enkargua egin diozu aparkatzea eragozteko poste horietako batzuk jar ditzaten.

Langileak etorri dira, burdin trinkozko posteak furgonetatik atera eta haien lekuan kokatu dituzte, fin-fin.

Besterik da furgoneta bertatik ateratzeko nola moldatuko ote diren…

Galizian ateratako argazkia omen da goikoa, tartean ebhin postaz iristen diren mezu horietako batean jasotaka. Ez gehiago galdetu, hauxe baita dakidan guztia!

Tak-taktaktak-taktak-taktakataktak-takatak-tak

joxe — Sat, 21 Feb 2009 00:20:45 +0000

Horixe izan da goizean bulegora iritsi naizenean bertan zegoen ‘soinu banda’. Albo batera begiratu, eta hantxe ikusi dut lumeruk, gure administratzailea, aspaldiko idazmakina erraldoi baten aurrean, izerditan.

Segurantza sozialerako zuzenketa eskari bat betetzen ari zen. Nonbait, SSren sistema informatikoak ez du aurreikusita erroreak ertatu ahal direnik, eta horrelakoak gertatzen direnean, paperezko zuzenketa eskaria egitea baino ez dute onartzen. Eskari hori gainera, ez dute onartzen eskuz beteta badago eta, formulario arraro batean datorrenez, idazmakinaz betetzea da aukera bakarra. Ze jurasikoa, ezta?

Star Trek XI

joxe — Fri, 06 Feb 2009 23:25:35 +0000

Horrekin akordatu naiz gaur etxera iristean, pareko horma ondoko honen moduko pegatinekin josita ikusi dudanean:

Une batez, pentsatu dut Star Treken film berriaren marketing birala izan zitekeela. Harik eta pegatinako Spockek daraman eraztuna ikusi eta ‘aurrekanpainarekin’ akordatu naizen arte:

Politika, berriz ere. Ez dudana asmatzen da norena izango den okurrentzia. PSOE? UPyD? PP? Karma? Zer diozue zuek?

Cesar Vidalen apologia

joxe — Wed, 07 Jan 2009 00:18:24 +0000

Errege Eguneko arratsaldea pasatzeko, zinemara joan naiz gaur, beste bi lagunekin, aspaldi bisitatzen ez nituen Getxoko Lauren zinemetara. Pelikula hasten zen bitartean, bueltatxo bat egin dugu zinema kokatuta dagoen kirol portuan zehar, eta bertako jolas aretoan ere sartu gara. Bideojoko zaharren artean, honako irudi honekin egin dugu topo:

Konturatu zarete? Makinari eusteko hiru liburu jarri dituzte jabeek. Bukaera tristea liburuontzako, zalantzarik gabe, eta gaur egungo gizartearen metafora ezin zehatzagoa: liburuak jolasteko makinaren euskarri, eta makina, berriz, gazteei eusten. Apur bat hurbildu gara, jakin-minak bultzatuta, eta hara zeintzuk diren makinaren euskarriak:

Beheko biak telefono aurkitegiak dira, gaitzerdi. Baina goikoari erreparatzen badiozue, “El Camino hacia la Cultura” izeneko entsegu liburu bat da. Izenburua ere ezin egokiagoa: kulturara iristeko bidea jolasteko makina baten azpian…

Baina seinaleak ez dira hor amaitzen: ikusten duzue nor den liburuaren egilea? Kontxo, kontxo, kontxo! Nor eta Cesar Vidal, historialari, idazle eta kazetari ospetsua. Besteak beste, COPEko La Linterna saioaren arduraduna da Vidal, eta duela urtebete edo, nahiko sona lortu zuen gure artean, bere saioan euskararen inguruan azaldu zituen tesiak eta iritziak direla eta. Orduko haiek entzunda/irakurrita, batek baino gehiagok pentsatuko zuen gizon honen lanek ez dutela ezertarako balio baina, hara non, denborak nor bere lekuan jarri duen, beste behin ere… Seguru gazte batek baino gehiagok eskertu duela Vidalen ekarpena!