Teknopataren txokoa

Lorategirako apaingarria

joxe — Thu, 29 Jul 2010 19:42:27 +0000

Zuotako askok ikusita izango duzue seguruenik Amelie gogoangarria. Hala bada, erraz oroituko dituzue munduan zehar bidaiatzen duten lorategiko ipotxak:

Amelieren ipotxek bidalitako postalak

Bada, lorategia duzuen zorionekoontzat, apaingarri ezin ederragoa dakarkizuet gaurkoan. Ipotxen antzekoa, baina askoz ere frikiagoa (eta ‘cool’-agoa, zergatik ez). Segi, segi irakurtzen!

Zuekin… lorategiko zonbia!!!

Ze ondo geratzen den petunien ondoan, ezta?

Erretxinazko 80 x 50 x 20 cm-ko figura honek ezin ederrago utziko du zure lorategia, eta lagun eta bisitari guztien harridura eragingo du atoan. Ikusiko duzu zer ondo pasatzen duzun hurrengo barbakoan lagunek zonbia ikusi eta salto-saltoka hasten direnean!

Bromatxoa -beti bezala- ez zaizu merke irtengo. Zonbi momifikatuak 70 euro inguru balio du webgune honetan, bidalketa gastuak aparte.

Zabildu

Pitiki dance

joxe — Wed, 28 Jul 2010 08:24:50 +0000

Bueeeeeno, ba iritsi da uda, eta harekin batera udako abesti ‘freskagarri’, dantzagarri eta ahanzgarriak, eta BlancoyNegroMixak eta… …egon! Euskaraz ez daukagu dantzarako musikarik! (fandango eta arin-arinetik harago, esan nahi dut).

Ala bai? Iaz Pixka bat es mucho eztabaidatuak bete omen zuen hutsune hori neurri batean behintzat… eta aurten? Bueno, hona aukera bat: aurrekoan lankide batek deskubritu eta beste batek berehala ‘pitiki dance’ gisa definitu zuena. Zuekin, Daia:

Zer iruditzen?

Note: There is a poll embedded within this post, please visit the site to participate in this post's poll.

Zabildu

Gero eta teknopatago

joxe — Tue, 27 Jul 2010 13:05:55 +0000

Amaitu da azken teknopatometroari erantzuteko epea eta datuak, lagunok, ezin adierazgarriagoak dira: urtebetean BIKOIZTU egin da oporretan 3G konexioa eramango duzuen (dugun) lagunen portzentajea, eta beste muturra ere, batere konexiorik egin ez duenarena, handitu egin da: 2009an zuotako batek ere ez zuen esan oporrak erabat offline pasatzeko asmorik zuenik. Aurten, berriz, %3k esan duzue (lagun batek, hain zuzen ere). Euskaldun identitario hauek -esango luke baten batek- beeeti muturreko jarreratan.

Edonola ere, offline, online edo borderline dela, ondo pasa oporrak (orain hartu behar dituzuenok). Gainontzekoei ere animo, gero sekulako inbidia emango diguzue eta!

Zabildu

Garai txarrak Applerentzat

joxe — Thu, 22 Jul 2010 21:02:46 +0000

Garai txarrak bizi ditu Steve Jobsen konpainiak: langileen baldintza kaskarrak eta suizidioak, Adoberekiko tirabirak Flash dela eta , iPhone 4ren antenaren auziak, enpresak erabiltzaileen kexei emandako erantzunak (arazoa ukatuz hasieran, erabiltzaileen abilezia faltaren ondorioa zela iradokiz, gero, eta azkenik, ‘beste batzuek ere badutela’ esanez) irudi arazo larria ekarri diote beste edozeren gainetik iruditik bizi diren sagartxoaren konpainiari. Horren adierazgarri ezin hobeak aurkitu ditut azken egunotan. Lehenengoa, Taiwanetik datorren bideo satiriko epiko hau:

Eta bigarrena, hurbilago aurkitutakoa (Barakaldoko IKEAn, hain zuzen ere), eta iritzi publikoak Appleri buruz duen irudiaren adierazgarri argi eta garbia. Horratx:

Äpplekaka, IKEAn ere konturatu dira honezkero!!! Jobsek larri ibili behar du!!!

Horixe bai: garai txarrak Applerentzat

Zabildu

Burua hotz… …eta oinak ere bai!!!

joxe — Wed, 21 Jul 2010 21:54:08 +0000

Hamaika arrazoi egon daiteke udan ere ordenagailu parean eserita egoteko: atzeratutako lanak, beste zereginik ez izatea, horretarako gogoa izatea besterik gabe…

Edonola ere, gaurkoan aurkitu dugun oporgailuak asko erraztuko dizue bizimodua egunik sargorienetan ere makinaren aurrean egon behar izanez gero. Coolguy du izena, eta USB ataken argindarra baliatzen du, zer eta oinak freskatzeko! Zoruan jartzen den kuxin moduko bat da eta, behin ordenagailura konektatuta, oinak gainean jarrita barruan daraman haizagailua martxan jarri eta haize freskoa botako digu, eroso-eroso egon gaitezen.

Hori bai, adi ibili beharko duzu Coolguy hori eskuratu nahian bazabiltza: momentuz Korean soilik saltzen da, eta ez dakigu zenbatean gainera! :/

[via: AVING]

Zabildu

Hizkuntz eklipsea

joxe — Tue, 13 Jul 2010 20:31:36 +0000

Gaurko eguna Galdakaoko Ospitaleko Larrialdiko zerbitzuan pasatzea tokatu zait. Ez larritu, ni ondo nago… taxilari lanetan joatea baino ez zait egokitu… nahiz eta auto txikia izanda horrelakoetatik libratuko nintzela pentsatu. (Ohar mentala: ez erosi SEKULA auto handirik, taxilari lanak gustuko izan ezean gutxienez!).

Ordu piloa egin dut han bueltaka, gora eta behera eta -asperraren asperraz- ene baitako talibana askatu dut, euskarazko eta gazelerazko kartelak irakurtzen eta konparatzen has zedin.“Azken egunotako albisteak ikusita, seguru euzkaras-en bat erraz topatuko duzula”, esan diot talibantxoari.

Eta hara non etorri zaidan taliban gaixoa, hitzik egin ezinik, begiak malkotan, bizitzan behin soilik ikus daitezkeen gertakizun horietako baten berri ematera. “Hara zer ikusi dudan gaixoen betebeharren taulan“, esan dit, hunkituta:

Gaixoen 7. betebeharra, gazteleraz. Klik irudian handiago ikusteko.

Gaixoen eskubide eta betebeharrak biltzen dituen kartel bat erakutsi dit orduan talibantxoak. Gaztelerazko bertsioan, azken betebeharra erabat ulertezina egin zait. Honelaxe dio:

7.- A utilizar los servicios de urgencia con la finalidad, de necesidad, para la que están creados, acudiendo perfectamente a los circuitos de servicios ordinarios.

Harrituta begiratu diot talibanari: “Joder, gaztelerazko esaldia horren kriptikoa bada, euskarazkoa zirilikoz idatzita egongo da gutxienez!”. Korrika hasi gara biok euskarazko bertsioaren bila.

Eta aurkitu ere, azkar aurkitu dugu. Honatx:

Gaixoen zazpigarren betebeharra, euskaraz. Egin klik irudian handiago ikusteko.

7.- Larrialdietako zerbitzuak sortu ziren beharrizanetarako erabiltzea eta, ondorioz, lehentasunez ohiko zerbitzuen sarera jotzea

Zirilikoz ez egoteaz gain, gaztelerazkoa baino askoz ere hobeto ulertzen da euskarazko esaldia!!! Esandakoa, lagunok: eklipseak bezala, bizitzan behin gertatzen diren gauza horietako bat…

Zabildu

Teknopatometroa: I need 3G

joxe — Thu, 08 Jul 2010 22:02:53 +0000

Alone, Giorgio Montersinorena, Flickr-en

Iaz galdetu genuen jadanik, baina tira, teknopatometroa erabat zientifikoa da, eta urtetik urtera joerak aldatzen ote diren jakin nahi dugu: interneti dagokionez, nola pasatu(ko) dituzue oporrak?

Ale, denok erantzutera!!! Uztaila bukaeran ikusiko ditugu emaitzak

Note: There is a poll embedded within this post, please visit the site to participate in this post's poll.

Zabildu

Surena, Asimoren lehengusu irandarra

joxe — Wed, 07 Jul 2010 22:45:32 +0000

Teknopatarik teknopatenok asi ezaguna izango duzue Asimo, HONDA etxe japoniarrak sortutako errobot antropomorfoa (androidea?). Askotan ikusi dugu telebistako albistegietan-eta eskaileretan gora eta behera, batzuetan trebezia handiz eta beste batzuetan baldarrago.

Asimoren eboluzioa

Baina badakizue, jakin, errobotak ez datozela Japoniatik soilik, eta aste honetan jakin dugunez, Asimok badu lehengusu bat, egia esan ‘susmagarriki’ berdintsua dena. Surena du izena eta -harrapazazue hori- Teherango Unibertsitateak sortu du, Irango presidente Mahmoud Ahmadinejad-ek berak azaldu duenez. Izena gerlari persiar batengandik hartu omen dute (glups!) eta, momentuz ibiltzeaz gain beste ezer gutxi egiten duen arren, esan dutenez laster gehituko dizkiote ikusteko eta bestelako abilidadeak izateko beharrezko moduluak.

Hona kriaturatxoaren aurkezpeneko irudi batzuk:

[via: engadget]

Zabildu

Eroski, krisia eta euskaldunon diskriminazio positiboa

joxe — Mon, 05 Jul 2010 16:05:12 +0000

Mundu mailako krisi ekonomikoa, langabezi tasa altuak, gizarte aurrekontuak maldan behera, zergak gora, BEZ %18ra… panorama horrekin gero eta zailagoa gizaki arruntok erosketak egitea… …bai eta saltokiek saltzea ere, noski.

Horregatik, seguruenik, Eroskik kontsumitzaile-bezero-gizaki arrunton aldeko kanpaina zoragarria jarri du martxan: erosketak egiterakoan etxeko poltsak eramaten badituzu, zentimo bateko deskontua egiten dute eramaten duzun poltsa bakoitzeko!!! Ikusi bestela:

Zentimo bateko deskontua ERABILI DUZUN POLTSA BAKOITZEKO. Wow!!!

Hain eskuzabalak iruditu zaizkit Eroskikoak ezen ’1 zentimo’ hori ere barkatzeko prest bainago! Pentsa! Aurrerantzean etxean pilatutako poltsa zaharrak Eroskira eraman besterik ez dugu erosketak dohainik (edo dirua itzulita akaso!) egiteko! Horri esaten diot nik krisiaren kontra gogor aritzea!!!

Enpin, ordenagailua itzali eta korrika batean noa Bilbondora, etxeko poltsa zahar guztiak hartuta, noski!

Baina… …oh, wait!

¿Cómo se dice "hubieras usado"? Esto... um... bah! Pon "erabili duzun", total, la parte en euskera no la lee nadie!

Um… beraz, gazteleraz zentimo bat deskontatzen dute erabiltzen EZ DEN poltsa bakoitzeko, eta euskaraz ERABILTZEN DEN poltsa bakoitzeko? Hau zer da, euskaldunen diskriminazio positiboa? Esker bikoitzak eman beharko Eroskiri orduan! Joe! Benetan eskuzabalak, ezta?

Eta, diot nik, publizitate legea kontuan hartuta (iragarkiek kontratu balioa dutela dio nonbait), joan liteke edozein euskaldun Eroskiko kutxara zaku bete poltsarekin, eta exijitu publizitatean jartzen duena bete eta poltsa bakoitzeko zentimo bat deskontatzeko? Horren ko-ofiziala da euskara, ala zerbait gutxiago? ¬.¬

Zabildu

Blogariak Amaraunean, 2010/07/04

joxe — Sun, 04 Jul 2010 12:26:33 +0000

Ana Malagonek, Haritz Rodriguezek eta Goio Telletxeak itxi dute (oraingoan bai!) ‘ikasturte’ honetako Amaraunaren solasaldia. Udan atseden hartzen utzi digute tarantulatxoek, eta dena ondo bidean udazkenean ekingo diogu berriro solasari. Gaurko gaien artean, honako hauek:

Ibaimusic.com, euskal musika erosteko webgunea. Eta bide batez beste hainbat: musikherria, musikaz blai…
Berriz ere Leroy, Youtube bidez famatu den gasteiztarra
HTML5 webguneak idazteko estandar berria (zer zaila irrati bidez azaltzea!!!)
Bizkaiko Greenpeace-k FaceBooki ateratzen dion zukua
iPhone 4ren arazoak eta hari egindako kritikak…

Entzun nahi?

Zabildu