Farrah Fawcett, 1976ko poster batean

Benito Fizek, Josi Sierrak eta hirurok itxi dugu ekaineko blogarion solasaldia Euskadi Irratiko Amarauna saioan. Bero honekin ez dago ganoraz idazteko modurik, eta beraz, horra labur-labur, ‘funebre’ samar geratu zitzaigun tartean komentatutako kontuak:

• EiTBrentzat korrespontsal lanak Txinan egiten dituen Olatz Simonek eskuratu du Rikardo Arregi Kazetaritza Sari Nagusia. Gainera, Gorka Bereziartuak, Kostaldeko Trena irratsaioak eta Tttipi-Ttapak ere jaso zuten Andoaingo Udalak 21. aldiz eman duen saria. Epaimahaian egotea tokatu zait aurten, eta esan behar oso-OSO-oso zaila izan dela sariak banatzea: lan piloa irakurri-ikusi-entzun behar izan ditugu, eta —benetan— denak ere izugarri onak. (Badakit beti esaten dela hori, baina, ei! Egia da! Benetan!). Bertigo apur bat ere ematen du esperientziak… nor naiz ni, kazetaritza lanik urrunena Zaratamon egin duena, Olatz Simon bezalako bati saria emateko? Enpin… edozein kasutan, oso esperientzia polita izan da, eta ez dakizue zer ondo pasatu genuen epaimahaikideok banaketaren osteko bazkarian!
• Uda Ikastaroak ere hartu ditugu hizpide, asteon Benito irakasle aritu behar zaigu eta.
• Gogglek berriz ere arazoak Txinan: oraingo honetan, ‘pornografia zabaltzen duelako’ aitzakia erabili du Txinako gobernuak Google eta Gmailera sarbidea blokeatzeko.
• Michael Jackson hil da. Sarean toki guztietan dago eta egongo da. Tarte batean Twitter erorita egon da. Lotura dute bi gertakariek? Bestalde, adibide ona da ikusteko Google eta Collecta bilatzaileen arteko ezberdintasuna. Badakit pelma bat naizela, baina Collectan sartzen bazarete Hot now Michael Jacksonen heriotza dago: http://www.collecta.com/#q=%22Michael%20Jackson%22 Hortxe dago une honetan ematen ari den informazioa; Googlen, berriz… Badirudi baietz, Twitter erorita egon zela Jacksonen heriotzagatik: http://ow.ly/fU6B
• Michael Jacksonen harira, ordu batzuk lehenago hil zen Farrah Fawcett aktorearekin ere akordatu gara, eta Joxe Arantzabalek Faroan komentatu duen legacy.com webguneaz ere aritu gara. Horrexekin bukatu zaigu denbora, eta eskerrak, ordurako larritzen hasiak geunden eta!

Enpin, hori dena eta gehiago, beti bezala, hemen azpian klik eginda entzungai, edota gure iTunes zein RSS jarioen bidez

• ETAren atentatuak sarean izan duen oihartzuna.
• Irango istiluak salatzko twitterreko avatar berdeen kontua.
• Asturiasko Printze sariak, posta elektronikoaren eta sakelakoaren asmatzaileei, eta asmakuntza bien bilakaera.
• Zugaz.com, gazteei zuzendutako sare sozial euskaldun berria.
• Gaztelumendiren sarrera honen harira, teknologia berriek zelan eragiten dioten kazetaritzari.
• Nafarroako Gobernuak euskarazko irratiak ixteko egin duen azken mugimendua.
• Collecta bilatzaile soziala (nolabait esatearren).
• Trourist.com bidaiatzeko proposamen berria

Esandakoak entzuteko, badakizue, egin klik hemen azpian, edo jo zuzenean Euskadi Irratiaren webgunera edo gure iTunes zein RSS jarioetara.

Gaurkoan, Josu Lezameta eta Josu Mendikute izan dira Bilboko estudioan, eta Maite Goñi Miramonen. Gai nagusiak, ondoko hauek:

• Europako hauteskundeetako, boto kontaketaren inguruko saltsa-maltsak: http://www.egianahidugu.org/
• Google Street View – Google Trike: http://maps.google.com/help/maps/streetviwe/
• Lucia Goñi: ezagutu bere webgunea: http://www.luciagoni.net/
• Marilyn Monroeren argazki argitaragabeak, Sustatun edo www.life.com

Esandakoak entzuteko, badakizue, egin klik hemen azpian, edo jo zuzenean Euskadi Irratiaren webgunera edo gure iTunes zein RSS jarioetara.

Star Trek-eko Spock Tricorder batekin. Tresna futurista horri koloreak ateratzen dizkio gaur egungo edozein telefonok!

Joan den asteko grabazioak kale egin zidan, baina oraingoan txintxo-txintxo portatu da nire PowerMac G4 (nahikoa egiten du gaixoak, 2001. urtekoa izateko!), eta hemen duzue Euskadi Irratiko Amarauna saioko blogarion solasaldia. Aste honetan, BATTERY LOW kartel gorria piztuta gabiltzan Benito, Josi eta hiruron txanda izan da. Eta tira, ahal izan dugun moduan defendatu gara!

Komentatu ditugun gaien artean, honako hauek:

• Joan den asteko Ibilaldiaren errepasutxoa. Josik bideo piloa igo du sarera. Galdakaon aurkeztu duen Galdutako Udaberriaren inguruan ere mintzatu gara apur bat.
• Aurreko horren harira, Euskal Eskola Publikoaren jaia eta atzo Gasteizen izan zen Mintza Eguna ere izan ditugu aipagai.
• Europako Legebiltzarrerako hauteskundeak ere izan ditugu aipagai. Maite Goñik artikulu interesgarri bat ere iradoki digu twitter bidez.
• Rahaf Harfoushek Donostian egindako hitzaldiaz ere aritu gara. Josik Obamaren komunikazio dohainak goraipatu ditu, armiarmatxoek gezurrezkoak direla esan dioten arren.
• Microsoftek aurkeztu duen Project Natal delakoa ere komentatu dugu. Eta hor Josik esan die armiarmatxoei ez larregi fidatzeko

Eta tira, David Carradineren eta Berlusconiren inguruko aipamen atropellatu pare batekin, amaitu egin da tartea. Loturak-eta Amaraunaren FaceBookeko orrian aurkituko dituzue.

Eta esandakoak, berriz, ba hemen azpian dituzue, baita Euskadi Irratiaren webgunean edo iTunes zein RSS bidez.